Memories Of A Lost Cause. Comparing Remembrance Of The Civil War By Southerners To The Anglo-Boer War By Afrikaners
In hierdie artikel word ondersoek ingestel na die ooreenkomste in die wyse waarop Suiderlinge in die Verenigde State van Amerika en Afrikaners in Suid-Afrika onderskeidelik na die Burgeroorlog van 1861-1865 en die Anglo-Boereoorlog van 1899-1902 teruggestaar het. Beide die Suiderlinge en die Afrikaners is verslaan en het wat hulle as hulle vryheid beskou het, verloor. Dit was vir beide gemeenskappe uiters moeilik om die nederlaag te aanvaar en hulle wou hulleself rehabiliteer. In die onderskeie rehabilitasieprosesse het hoogs vergelykbare verwikkelinge plaasgevind, soos die bou van gedenktekens om nie net hulde te bring aan die opofferings van "helde" wat hulle lewens vir die droom opgeoffer het nie, maar ook om terselfdertyd die stryd teen die "invallers" van buite te regverdig. Die herdenking van die Verlore Droom van onderskeidelik die Suiderlinge en die Afrikaners is meer as 'n eeu na die onderskeie oorloë steeds aan die orde van die dag. Dit is duidelik dat gemeenskappe nie maklik 'n daad wat hulle as 'n onreg beleef, vergeet nie.